الرئيس السيسى: الحروب لها تأثيرات سلبية ونحتاج لمزيد من العمل لمواجهة الأزمة

 أكد الرئيس عبد الفتاح السيسي، أن للحروب تأثيرات سلبية كبيرة وممتدة، متابعا: "أقصد في كلمتي اللي أنا قولتها للرئيس ترامب ولحتى لدول المنطقة بالكامل.. الحروب دايمًا آثارها، وإحنا في مصر عشنا ده، وأنا الجيل بتاعي عاش الحروب 56 و67 وحرب اليمن وحرب 73 وحرب ضد الإرهاب، وكان دايمًا الحروب مالهاش غير نتيجة واحدة هي الخسارة والخراب والتدمير، محدش بيطلع منها يعني سعيد أو كسبان. فأرجو إن إحنا كلنا، كلنا في العالم كله، يعني نعمل بقدر المستطاع على إيقاف الأزمات

وأضاف الرئيس السيسي، خلال كلمته في مؤتمر ومعرض مصر الدولى للطاقة: "إن يكون ما بعد الأزمة.. الأزمة اللي إحنا بنعيشها ليس كقبلها. وده يمكن يتطلب من الشركات اللي موجودة هنا إن هي، وكل من هو معني بالطاقة في العالم، على إنه يبذل مزيد من الجهد لاستكشاف المزيد من الطاقة سواء كانت الغاز أو البترول، وأيضًا في مجال الطاقة الجديدة والمتجددة عشان نقلل من التداعيات والتأثيرات الخاصة بهذا الأمر".

وتابع الرئيس السيسي: "أنا بس قبل ما أنهي كلمتي وأدي الفرصة لصديقي الرئيس نيكوس للحديث أيضًا، أنا عايز أقولكم إن لما بيضرب مصنع للحديد والصلب أو مصنع أو مجمع للألومنيوم أو يخرج من الخدمة، أو منشأة للغاز أو منشأة للبترول وتخرج من الخدمة، عشان تعود مرة تانية بتقعد فترة طويلة، ثم إن هي كانت جزء من سلاسل الإمداد للمنتجات بتاعتها في الأسواق العالمية، لما ده ميبقاش موجود والعالم مش مستعد لهذا الأمر، ده بيمثل صدمات أخرى محتملة".

وأكمل الرئيس السيسي: "مش عايز أطول عليكم أكتر من كده، برحب بيكم أهلًا وسهلًا في مصر، بشكركم على وجودكم معانا في الظروف ديت، بشكركم على تعاونكم، بدعوكم لمزيد من العمل لأن الوقت الحالي اللي إحنا فيه هو وقت مزيد من العمل لتخفيف من حدة الأزمة اللي ممكن بنواجهها واللي ممكن العالم يواجهها لو استمرت الحرب أكتر من كده.. شكرًا جزيلًا واسمحولي إن أنا أرحب مرة تانية أرحب بفخامة الرئيس نيكوس واسمحلي إن إحنا هيسعدنا أن تلقي كلمة