«اتعمل معاهم الجلاشة».. فنانون تعرضوا للنصب اعرف التفاصيل ؟
من كام شهر طلع الفنان محمد فؤاد تريند بعد ما اتنصب عليه في شقي عمره.. و12 مليون جنية راحوا منه في الهوا.. فؤاد اتعرض لعملية نصب كبيرة من مجموعة من الأشخاص، أوهموه بتكوين شركة عقارية.. ولما راح عمل محضر قال ان المتهمين خدوا منه المبلغ المتفق عليه في شروط التعاقد لتكوين الشركة لكن ما التزموش بالاتفاق.
محمد فؤاد عمل فيهم محضر في قسم شرطة الشروق اتهم فيه الجماعة دول، بالنصب عليه في مبلغ 12 مليون جنيه، وكمان اتهمهم بعدم دفع الفوايد، ومخالفة شروط العقد الخاصة بتكوين شركة عقارية بينهم.. علشان كدة جهات التحقيق استعجلت التحريات في واقعة محمد فؤاد.. ضد 3 أشخاص ذكر اسمائهم حصلوا منه على مبلغ 12 مليون.
ومش محمد فؤاد بس اللي اتعرض للنصب لاء ده في غيره كتير منهم، الفنانة هنا الزاهد اللي اتعرضت هي كمان لعملية نصب في شهر مايو 2022، كتبت الفنانة هنا الزاهد على صفحتها رسالة غامضة كسفت فيها تعرضها للنصب هي وأختها، وقتها قالت “هنا” انهم ساكتين بقالهم شهر عمالين يلتمسوا الأعذار للناس اللي أخذت فلوسهم.
بعدها كتبت رسالة تهديد للمتهمين بانلو ما اخذتش فلوسها هتشرح ايه اللي حصل لهم وبالاسامي.وقالت في رسالتها ان الناس اللي تعبوها بقالهم شهر دخلوها هي واختها في قصص مش قصصهم.
كمان الفنان “محمد جمعة” اتعرض هو كمان لعملية نصب في شهر مارس 2022، من إحدى شركات المحمول المعروفة، جمعة اعلن على صفحته الرسمية بموقع التواصل الاجتماعى فيسبوك قال لو فيه حد مسؤول في الشركة دي ياريت يتواصل معاه، لأنه تعرض للنصب منها.
اما بقى الفنانة “بدرية طلبة” فواقعة النصب اللي اتعرضت لبها كانت غريبة، في شهر مارس 2022 كشفت الفنانة بدرية طلبة، عن تعرضها للنصب من واحدة زميلتها داخل الوسط الفني خلال مشاركتها في أحد الأعمال الفنية.
بدرية طلبة قالت خلال لقائها في برنامج «من غير فلتر» مع الإعلامية الكويتية علياء جوهر، إنّ الواقعة دي حصلت برة مصر وسببت أزمة نفسية كبيرة لها، لدرجة انها قعدت تبكي على فلوسها اللي راحت من المطار لحد ما وصلت مصر.
الفنان “مصطفى درويش” انضم هو كمان لقايمة الفنانين اللي اتعرضوا للنصب في مبلغ 5 مليون جنيه.. في شهر فبراير 2021، الفنان مصطفى دوريش طلع وقال انه وقع ضحية للنصب من شخص اجر له مطعم مقابل 5 ملايين جنيه.. بعدها اتفاجئ ان المتهم ادعى إن هو صاحب المطعم بعدما قام بتزوير بعض الأوراق الرسمية اللي بتبين ملكيته للمكان.
مصطفى درويش وقتها طلع بيان صحفي قال فيه إن الشخص ده قام بتزوير العقود الخاصة بالمطعم وكمان طلع تراخيص باسمه من الحي.. درويش اكد في بيانه انه اكتشف القصة الغريبة دي بطريق الصدفة فاضطر يعمل محضر نصب ضده في قسم الشرطة التابع له.
